ناس عمان

بَلش المّوضُوع كُله في سَنِة ال 2012 لمّا إجت الفِكرة مِن صَفحِة ناس نيُويورك على الفِيس بوك. شُعور إنك تقَرِب مِن ناس عَشوائين مَا عُمرك إلتقيت فِيهُم وتِسمَع قِصصهُم وتجارِبهُم بالحَياة مِن دُون مَا تركِز على عِرقهُم, جِنسهُم أو لُونهُم هُو شُعور جِداً رائِع. طبقنا الفكرة وبَلشِنا فوراً بالتَصويِر, واِنضَم للمّشروع ناس مآمنيِن وحابين الفِكرة و كّبِر و صَارت هاي الصُور والقِصص مِحَور لصَفحة حَيّوية على الفِيس بُوك بِتقَدِم جُزء مِن مُقتطفات الحّياة اليَومِية مَا بيِن شَرق المّدِينة القَدِيم وغَربها الحَديث لِناس عايشة في عمّان ومحافظات الأردُن كلها مَا بِنعرِف عَنهُم أي إشي. مَرّينا بِكتير مِن العثرات والمَصاعِب لَحتى قدِرنا نُوصل لَهُون, صار مَشروع ناس عمّان جُزء كبير ومُهِم مِن حياتنا اليّومية, إنك تِصحَى مِن النُوم كُل يُوم الصُبح لَتعِيش مُغامرة جديدة وتقابِل وتِسمع قصص النّاس يلي بِتقابِلهُم بِشوارِع المَدينة وتِتعلم مِنهُم هُو أحلى شُعور مُمكن إنه الواحَد يِعيشُه. والأحلى مِن هِيك, إنه عَم نوّصِل شُو عَم نِعمِل ونشارِك النّاس والعالم بِتجربتنا مّع ناس عايشة في عمّان والأردُن. كِتاب نَاس عمّان هُو ثِمرة رِحلِتنا الطَويلِة والجَميلِة في شّوارِع مَديِنتا العريقة يلي مِن خِلالها قدِرنا نِلتقط المُقطتفات اليّومية لَناس زَينا وزِيكُم حَبّوا يِشاركُونا قِصَصهم وتَجارِبهُم بالحّياة. بِنحِب نُشكُر كُل مِين شَجعنا, آمن فينا ودَعم الِمّشروع وبنِتمنى إنكُم تِستَمتِعوا بالكِتاب مِتل مَا إحِنا إستَمتعنا فِيه وإحنا عَم نِشتِغل عليه. كل الحب.